ما هي مواصفات المدير المالي

البوست اللي في الصورة ده بيقول " أن المدير المالي لماكينزي مُهندس وليس لديه خلفيه مُحاسبية ولا يحمل شهادة مهنية ... ويُبرهن على أن الشركات الكبيرة أصبحت ترى دور المدير المالي بشكل مُختلف"



المدير المالي لماكينزي بهذه المُؤهلات هو استثناء ... والاستثناء يُؤكد القاعدة ... أي أن الأصل في المدير المالي أن يكون لديه - على الأقل - خلفية مُحاسبية تمويلية ... بس تعال كده نتكلم شوية في النقطة الجوهرية دي وخصوصًا نقطة الشهادة المهنية.

لما ببص على التقارير سنوية أو ربع سنوية للشركات اللي بتابعها بأخذ لفة كده على مجلس الإدارة وأشوف مُؤهلاتهم إيه ... فلاحظت أن عدد لا بأس به من المُديرين الماليين لا يحملون شهادة مهنية، وأقصى ما يحملونه هو ماجستير في إدارة الأعمال.

فعندك مثلًا المُدراء الماليين للشركات دي لا يحملون شهادة مهنية (آبل – جوجل – مايكروسوفت – أمازون – جنرال موتورز – فورد – سيتي جروب – بنك أوف أمريكا – إكسون موبيل).

طيب … عاوز أقول إيه؟

عاوز أقولك إن الشركات دي لما تحب تعينك في المناصب العُليا ستُرجح شخصيتك القيادية، تفكيرك الاستراتيجي، خبرتك التشغيلية وخبرة الصناعة، قدرتك على التأثير وصناعة البراند، وخبرة التعامل مع المُستثمرين والأسواق وجمع المال ...

ستُرجح كل ذلك على على شهادتك المهنية.

عارف ليه؟

لأن هو عاوزك تبيع له السهم ... عاوزك تجيب له مُستثمرين ومُحللين يغطوا السهم ... عاوزك تصنع براند لنفسك وللشركة ... مش عاوزك تفكر في مُعالجات مُحاسبية أو معايير وبتاع ... الكلام ده في ألف واحد يعمله ... لكن اللي بيعرف يكلم المُستثمرين والمُحللين، ويُمثل الشركة في الفعاليات والمُؤتمرات، ويُؤثر في اللي حواليه … يتعدوا على الأصابع.

ممكن تقولي الموضوع بيمشي في الأخر بالعلاقات! هقول أصلًا العلاقات مش هتيجي إلا بالمهارات دي.

يعني مش لازم أحصل على شهادة مهنية عشان أوصل للمناصب دي؟

بص ... الموضوع هنا فيه تفصيل ... يعني لو أنت أتولدت واشتغلت في بيئة زي اللي فيها الشركات دي، فأقدر أقولك إنك بنسبة كبيرة قد لا تحتاج شهادة مهنية يكفي شهادة جامعية من جامعة مُحترمة مع خبرة في الصناعة ... لأن وجودك في البيئة دي هيساعدك بشكل غير مباشر في اكتساب المهارات اللي بتدور عليها الشركات.

لكن لو قدرك أنك أتولدت في بيئة عادية زي أغلبنا ... فهنا غصب عنك هتجري على الشهادات المهنية لأنها الحل السريع للخروج من ظروفك الحالية لظروف أفضل، ولأن الشركات اللي في البيئة دي عندها عقدة الشهادات المهنية (مع أن شركات اللي اخترعوها الموضوع عندهم عادي).

ونافلة القول …

▪️وأنت في سن صغير يُفضل تحصل على شهادة مهنية، وكل ما حصلت عليها في سن مُبكر كل ما كان أفضل، لأن الشهادة ستمنحك أفضلية وموثوقية وخبرات فنية هتحتاجها في وظائف السن ده (وكفاية شهادة واحدة كبيرة متروحش تاخد سبعتلاف شهادة).

▪️لكن لو عينك على المناصب العُليا يبقى لازم تشتغل على المهارات اللي ذكرناها لأن بدونها الشهادة ولا حتى المُحاسبة هتكون شفيع ليك … عشان متجيش تقول إشمعنا عينوا فلان وسابوني.

ولو عاوز تتأكد من كلامي … شوف بروفيل أي مدير مالي لشركة كبيرة … شوفه بيتكلم في إيه، وبيكلم مين، وبيصنع إيه.

وطبعاً مش عاوزين ننسى أن الموضوع في النهاية أرزاق يوزعها سبحانه كيف يشاء.

وهختم باقتباس من صاحب البوست:

▪️إذا كنت ترغب في القيادة، فلا يمكنك فقط "القيام بالمهمة"، عليك أن تُشّكل كيف يراك الناس.
▪️أفضل الفرص لا تذهب إلى الأكثر تأهيلًا، بل إلى الأكثر تأثيًرا.
▪️التأثير يأخذك إلى أماكن لا تستطيعها الشهادات.
▪️التأثير يفوز بالصفقات.