كيف تسرق شركة OpenAI البيانات

وليد ياسين

04-04-2025, 01:30 PM

2 دقائق

التحديث الجديد لشات جي بي تي يسمح لك أنك تحول أي صورة إلى رسومات كرتونية على شكل أنمي بدقة رهيبة …

الموضوع بقى ترند حاليًا وناس كتير شاركت صورهم الشخصية بعد تحويلها إلى رسومات كرتونية …

طب الصور دي مش بتفكرك بحاجة ؟

أه … بتفكرني بالرسومات الكرتونية اللي أنتجها استوديو Ghibli الشهير في أفلام الأنمي اليابانية بإشراف رسام الرسوم المتحركة الأسطوري ميازاكي …

طيب … وشات جي بي تي تدرب على الصور دي إزاي ؟ هل أخذ إذن ميازاكي ؟

لا عادي الموضوع بسيط … سام ألتمان صاحب شات جي بي تي استغل ثغرة في القانون الياباني عن حقوق الملكية الفكرية ودرب النموذج على الرسومات دي …

طيب مش ده بيتعارض مع قوانين الرأسمالية والليبرالية والنيو ليبرية فيما يخص حقوق الملكية الفكرية الخاصة والحق في التملك وبراءات الاختراع وكده؟ وكمان الموضوع كده غير أخلاقي؟

كلامك صحيح … بس الكلام بتاع حقوق الملكية ومش عارف إيه ده لو هيتعارض مع فكرة النمو يبقى كأنه صنم عجوة نأكله وقت ما إحنا عاوزين … الكلام ده مش للأمريكان ولا للشركات الأمريكية … ده للناس التانية بس …